சைபர் குற்றவாளிகளை கொண்டாடும் உலக முதலாளிகள்..!

மாறிவரும் உலகில் முன்னெப்போதும் இல்லாத அளவிற்கு அசுர வளர்ச்சி அடைந்து கொண்டிருப்பது அறிவியல்துறை.

குறிப்பாக இருபதாம் நூற்றாண்டின் தொடக்கத்திலிருந்து இந்த நூற்றாண்டின் தொடக்கம் வரையிலான குறுகிய  காலத்தில் இந்த அறிவியல் துறையில் ஏற்பட்ட அதிகமான மாற்றம் அத்துறை மட்டுமல்லாது பல துறைகளிலும் பல்வேறு தாக்கங்களை ஏற்படுத்தி வருகிறது.

இந்த அறிவியலில்,வானியல்,அணுவியல் என தொடங்கி அதன் வளர்ச்சியின் வேகத்தில் பல்வேறு தாக்கங்களை ஏற்படுத்தியவை நாம் கடந்த காலங்களில் கண்டிருக்கிறோம்.

இன்று அனைத்தையும் விட அதிகமான தாக்கங்களை உண்டாக்கிக் கொண்டிருக்கும் அறிவியல் துறையாக பரிணமித்திருக்கிறது இந்த சைபர் துறை.

ஏறக்குறைய உலகின் அனைத்து நாடுகளும் தங்கள் அரசுகளின் பாதுகாப்பிற்காக பல்வேறு மட்டங்களில் இந்த சைபர் படைகளை உருவாக்கி வருகின்றது.

ஒரு நாடு உருவாக்கி வைத்திருக்கும் சைபர் படையை வைத்து எதிரி நாடுகளின் தகவல்களைத் திருடுவது என தொடங்கி அந்த நாட்டை உளவு பார்ப்பது வரையிலான அனைத்து வேலைகளுக்கும் பயன்படுத்துகின்றனர்.

மேலும் இந்தத் துறையானது ஒற்றையாக இல்லாமல் அனைத்து பாதுகாப்பு துறைகளுக்கும் முதுகெலும்பாக அந்த துறையின் செயல்பாடுகளுக்கான தகவல் மையமாக இருந்து வருகிறது.

அறிவியல் துறையில் நடந்த அபரிவித மாற்றத்தின் விளைவால் உருவாகியுள்ள இந்த துறை இன்று வெறும் அரசு கட்டுப்பாட்டில் உள்ள துறைகளுக்கு மட்டுமல்லாமல் சமூகத்தில் உள்ள பல குற்றங்களுக்கும் காரணமான ஒன்றாகியுள்ளது.

ஒரு அரசு தனக்கு  எதிராக உள்ளவர்களின் தகவல்களை திருடவும் உளவு பார்ப்பதை போன்று சமூகத்திலுள்ள தொழில் நிறுவனங்களும் தங்களுடைய போட்டி தொழில் நிறுவனங்களின் தகவல்கள் திருடுவதற்கு இந்த மாதிரியான சைபர் குற்றவியலை ஊக்குவிக்கின்றன.

அமெரிக்க ஒன்றியத்தில் இது தொடர்பாக நடைபெற்ற ஆய்வு ஒன்று  சிறு குறு தொழில் நிறுவனங்கள் மீது அதிகமான சைபர் தாக்குதல் செய்யப்படுவதாக தெரிவித்திருக்கின்றது. மேலும் இந்த ஆய்வானது ஒரு புள்ளி விவரத்தையும் வெளியிட்டு இருக்கிறது.

2017 ஆம் ஆண்டு 63 சதவீத சிறு குறு தொழிற்சாலைகளில் சைபர் தாக்குதல் நடைபெற்றதாகவும், 2018 ல் அந்த தாக்குதல்  70 சதவீதமாக இருந்ததாகவும் இந்த ஆண்டு அது 76 சதவீதமாக அதிகரித்து இருப்பதாகவும் அதிர்ச்சி தகவலை தெரிவித்து இருக்கிறது.

அமெரிக்க தொழில் நிறுவனங்களின் முக்கால் பங்கு நிறுவனங்களின் மீது சைபர் தாக்குதல்கள் நடைபெற்றுக்கொண்டிருகிறது என்பது அமேரிக்கா மட்டுமின்றி உலகமெங்கும் உள்ள பல்வேறு தொழில் முனைவோர்களுக்கும் தொழில் நிறுவனங்களுக்கும்  பெரும் அச்சத்தையும் ஆபத்தையும் ஏற்படுத்தியுள்ளது .

இது தொழில் துறையில் மிகவும் மோசமான பாதுகாப்பற்ற நிலைமை உணர்த்துகிறது.

இது போன்ற நிறுவனங்களில் இருந்து சைபர் தாக்குதல் நடத்தி 62% வாடிக்கையாளர்களின் தகவல்கள் எடுக்கப்படுவதாகவும் 48% வங்கி கடன் அட்டை தொடர்பான விவரங்களை எடுக்கப்படுவதாகவும்.  மேலும் 30 சதவீதம் வாடிக்கையாளர்களின் சொத்து விவரங்களை பற்றிய தகவல்கள் திருடப்படுவதாகவும் தெரிவிக்கப்பட்டுள்ளது.

சைபர் தாக்குதல்களில் இருந்து தங்கள் நிறுவனங்களை, தங்கள் நிறுவங்களின் தரவுகளை தற்காத்துக்கொள்ள இந்த நிறுவனங்கள் அதிகமான சைபர் கிரிமினல்களையே நாடுகிறார்கள் என்பதும் இங்கு குறிப்பிடத்தக்கது.

இந்த மாதிரியான சைபர் தாக்குதல்கள் தகவல் திருடுவதற்காக மட்டுமன்றி பணம் பறிப்பது வரையில் நீண்டு கொண்டே இருப்பது என்பதும் அதன் நீட்சி தமிழ்நாடு வரையிலும் வளர்ந்திருப்பதென்பதும்நமக்கு அச்சத்தையும் பரபரப்பையும்  ஏற்படுத்துகிறது.

கடந்த சில மாதங்களுக்கு முன் தமிழ்நாட்டில் பல்வேறு இடங்களில் உள்ள புகைப்பட நிறுவனங்களின் கணினிகள்,இணையதளங்கள் பணத்திற்காக முடக்கப்பட்டதே இதற்கு சான்று. மேலும் எதிர்காலங்களில் பல்வேறு சைபர் தாக்குதல்கள் நடைபெறுவதற்கான வாய்ப்புகளுக்காண வழிகோலாக இந்த சம்பவம் இருக்கிறது.